Hamis Kiiza amcharukia kocha wake Yanga

KATIKA hali ya kutatanisha, straika wa Yanga, Hamis Kiiza raia wa Uganda amekuja juu na kususia uamuzi wa kutolewa nje na benchi la ufundi linaloongozwa na Mholanzi Ernest Brandts.

Kiiza alitolewa katika mechi yao na JKT Oljoro Alhamisi iliyopita ambayo walishinda kwa mabao 3-0.

Lakini pamoja na kitendo hicho, Kocha Msaidizi wa Yanga, Fred Minziro amemtetea na kusema ni hali ya kawaida kwa mchezaji kuchukia anapotolewa nje.

Kiiza ana mabao manane akimfukuzia kwa karibu Amissi Tambwe wa Simba anayeongoza kwa mabao kumi. Kiiza alichukia baada ya kutolewa kwenye mchezo huo mara baada ya kipindi cha kwanza kumalizika na nafasi yake aliingizwa, Jerry Tegete aliyecheza dakika 45 za kipindi cha pili jambo ambalo hakulifurahia na ndipo akaamua kutoa la moyoni.

Katika kuonyesha hasira, alitoka chumba wanachopumzikia wachezaji wote uwanjani na kwenda nje kwenye korido na kukaa akiwaacha wenzake vyumbani huko wakizungumza pamoja na bechi la ufundi na uongozi wa timu akiwemo Mwenyekiti wao, Yusuph Manji aliyeingia kuwapongeza.

Akiwa ameketi nje, Kiiza alikuwa akilalamika kwa kutoa maneno makali akiashiria kuchukizwa kwake: “Nimekuwa nacheza pembeni kama winga wa kushoto lakini kwa juhudi zangu nafunga, nimecheza katikati leo (Alhamisi) kidogo tu kwa sababu sijafunga nalaumiwa na kutolewa nje.”

“Mimi sijapenda na sijui tatizo ni nini. Kabla ya mechi niliwaambia kama watanitoa leo wasinichezeshe na kama wananichezesha wasinitoe,” alisema Kiiza.

Baadaye akaongeza maneno haya bila kumtaja ni nani anayemzungumzia kabla ya kuondoka kwa hasira: “Nitaongea na mabosi wake, ama zangu ama zake.”

Minziro kwa upande wake alisema: “Kitendo cha Kiiza kuchukia kutolewa ni jambo la kawaida kwa mchezaji, hakuna anayependa kutolewa kwenye mechi.”

Baadhi ya wachezaji wamesema, Kiiza alichukizwa na kitendo cha kutolewa nje kwani alitaka kubaki ili afunge mabao amkaribie Tambwe na kumaliza vizuri mzunguko wa kwanza.

Chanzo Mwanaspoti