Sterwart: Niliacha kazi Azam tangu Oktoba

STEWART Hall amethibitisha kuwa alivunja mkataba na Azam FC mwezi uliopita lakini wakakubaliana iwe siri kati yake na kigogo wa timu hiyo Abubakar Bakhresa.

Hata hivyo kocha huyo ameweka wazi kuwa alisaini mkataba muda huohuo na timu nyingine ya Bongo ingawa hakuiweka wazi.

“Tulizungumza na Abubakar, alinikubalia na ikabaki siri kati yangu na yeye, niliendelea na timu ili kumpa nafasi atafute kocha mwingine. Nisingeweza kuondoka hivyo, malengo yalikuwa kumaliza mzunguko wa kwanza kileleni ingawa tumekuwa wa pili,” alisema Hall.

“Nimekaa muda mrefu Azam, nimefanya mengi mazuri lakini si kila kiongozi aliridhika, hata wakati mwingine ningeshinda michezo mingi lakini kuna viongozi ambao hawakunitaka. Kibaya zaidi viongozi hao hawakupenda ukaribu wangu na wachezaji, niliona na kushauri lakini nilipigwa vita,” alisema.

“Mpira wa Tanzania umejaa siasa, wachezaji wote ni bora lakini pongezi zangu za heshima kwa Aggrey Moris na Waziri Salum kwa kuwa wachezaji wangu bora, ingawa pia Kipre Tchetche alifanya kazi nzuri,” alisema.

Kuhusu wapi aliposaini mkataba kama mkurugenzi wa ufundi kocha huyo alisema: “Siwezi kusema lolote, mfano nikisema ninaenda Simba, sitokuwa nimelifanyia haki benchi la ufundi au kocha aliyepo Simba sasa.”