Mastaa watatu wa Mazembe wasakwa

SERIKALI ya Zambia imetoa hati ya kukamatwa kwa wanasoka watatu wa nchi hiyo ambao walikosa mechi ya kirafiki wakati Chipolopolo iliponyukwa mabao 2-0 na Brazil juzi Jumanne.

Wanasoka hao ni wale wanaochezea klabu ya TP Mazembe ya DR Congo ambao ni Rainford Kalaba, Stoppila Sunzu pamoja na Nathan Sinkala.

Wote hawakucheza mechi hiyo kwa madai kuwa ni majeruhi, madai ambayo yalilikera Shirikisho la Soka la Zambia na hivyo serikali ya nchi hiyo kuamua kuingilia.

Baada ya wachezaji hao kusafirishwa kwa ndege ya kukodi kutoka DR Congo hadi Lusaka Zambia ili kufanyiwa vipimo kama kweli ni wagonjwa, shirikisho hilo la Zambia lilisema bado walipaswa kwenda kwenye kambi ya timu iliyokuwa Beijing, China walikomenyana na Brazil, lakini Mazembe iliwataka warudi DR Congo na wakafanya hivyo.

Jambo hilo liliichukiza Serikali ya Zambia na kuwanyang’anya pasi za kusafiria ili tu wasiweza kurudi Lubumbashi kuungana na klabu yao.

Lakini wachezaji waliweza kupenya kwenye mpaka wa nchi hizo mbili na inaaminika kwa sasa wapo DR Congo.

Shirikisho la Soka la Zambia limeiandikia barua Fifa likiilalamikia Mazembe kwa kugoma kuwaruhusu wachezaji hao walipohitajika kwa ajili ya mechi za kimataifa. Kwenye mechi ya kirafiki iliyopigwa Beijing, kikosi cha Zambia kilifungwa mabao 2-0 yaliyowekwa kimiani na Oscar na Dede ikiwa ni mechi ya kwanza kwa nchi hiyo kumenyana na Brazil. Mechi hiyo pia ilikuwa ya kwanza kwa kocha wa muda, Patrice Beaumelle, 35, aliyechukua mikoba ya Herve Renard aliyetimka siku 10 zilizopita kufutia Zambia kufeli kuingia katika mchujo wa kusaka tiketi ya fainali za Kombe la Dunia.