Serena Williams: Mwanamke wa nguvu anayepiga pesa ndefu kupitia tenisi

UMBO lake la kibantu linatajwa kuwavuta watu wengi kwenye mechi zake za tenisi licha ya kuwa hodari pia wa mchezo huo.

Mapaparazi mara kadhaa wamekuwa wakimvizia mrembo huyo akiwa amejipumzisha kwenye fukwe mbalimbali wakiwania kumpiga picha ili kuona mwonekane wake unakuwaje anapokuwa huko.

Hata hivyo, jitihada zao zote hizo kwa sasa ni mtu mmoja tu ukimuuliza ndiye atakwambia kuhusu mrembo huyo, mtu huyo ni Patrick Mouratoglou. Anaweza kukwambia kitu kuhusu yeye kwa kuwa baada ya kuwa kocha wake, sasa amegeuka na kuwa mpenzi.  Ushamfahamu?

Huyu ni Serena Jameka Williams, supastaa wa tenisi anayewapa shida kubwa wanaume kwa sababu ni mwanamke makini na anajiweza. Serena aliyezaliwa Septemba 26, 1981, ndiye mchezaji namba moja katika viwango vya mchezo wa tenisi duniani kwa upande wa wachezaji wa kike.

Mataji yake makubwa 17 (Grand Slam) aliyoyatwaa yanampa hadhi kubwa na kuwa mwanamke mwenye pesa za nguvu duniani.

Serena ni mrembo mwenye pesa za nguvu na anatajwa kuwa na pato la Dola 45 milioni kwa mujibu wa Forbes, wakati jarida la CelebrityNetworth linadai staa huyo ana pato linalokadiriwa kuwa Dola 100 milioni na ameingiza zaidi ya Dola 38 milioni kama zawadi ya pesa alizovuna katika mchezo huo.

Chanzo cha kipato

Kwa mujibu wa Forbes, Serena kwa mwaka wa 2012 hadi 2013 ametengeneza pesa kiasi cha Dola 20 milioni, huku mshahara, zawadi za ushindi na bonasi nyingine zikimwingizia Dola 8.5 milioni.

Kwenye mikataba ya kibiashara inayofanya kazi na mkali huyo wa tenisi ikiwa pamoja na Nike, Wilson, Gatorade, OPI na CitRix, vyanzo hivyo vimemwingizia Dola 12 milioni. Kwenye Forbes, Serena anatajwa kuwa mwanamichezo namba 68 duniani anayelipwa pesa ndefu.

Sarena, ambaye dada yake Venus Williams pia ni mcheza tenisi, ni mkali wa kike kwenye mchezo huo aliyevuna pesa nyingi kama zawadi kwenye mashindano na anashikilia rekodi ya kuwa mchezaji mwenye umri mkubwa kuwa namba moja kwenye viwango vya mchezo huo duniani.

Serena ni nyota mwenye jina kubwa Marekani na hilo limemletea dili nyingi za udhamini na hivyo kumfanya avune pesa nyingi kwa miaka yake yote aliyodumu kwenye mchezo huo.

Katika maisha yake ya tenisi, Serena alivuna Dola 12 milioni mwaka 2003, Dola 10 milioni (2004), Dola 12.7 milioni (2005), Dola 10 milioni (2006), Dola 14 milioni (2007), Dola 14 milioni (2008), Dola 17 milioni (2009), Dola 20 milioni (2010), Dola 12 milioni (2011), Dola 13 milioni (2012) na Dola 20 milioni katika nusu ya mwaka 2013.

Mali na magari ya kifahari

Mrembo Serena anamiliki jumba moja la nguvu lenye thamani ya Dola 2 milioni huko West Palm Beach, jumba hilo lipo kwenye Visiwa vya Ballen.

Alinunua jumba hilo mwaka 2009 na limejengwa kwenye eneo lenye ukubwa wa ekari moja. Lina vyumba vinne vikubwa vya kulala na mabafu matano na bwawa la kuogelea.

Serena anamiliki pia magari ya kifahari na yenye hadhi kubwa kama Bentley Continental Supersports, Mercedes-Benz GL, Ferrari, Range Rover na Audi T ikiwa ni baadhi tu ya magari yanayoendeshwa na staa huyo wa kike.

Atoka na kocha wake, apata mdogo wake

Ilikuwa uvumi, lakini kwa siku za hivi karibuni imeonekana dhahiri kwamba Serena anatoka kimapenzi na kocha Mouratoglou. Wadadisi wa mambo wanadai penzi hilo la kocha ndilo linalomfanya Serena kuwa na makali ya nguvu uwanjani kwa sababu yanamfanya kutuliza akili yake.

Katika uvumi mwingine, Serena anadaiwa kupata mdogo wake wa kiume baada ya baba yake mwenye umri zaidi ya miaka 70 kupata mtoto na mkewe aliyemzidi karibu nusu ya umri, Lakeisha.

Mdogo huyo wa kiume, Dylan, anadaiwa kuzaliwa mwaka jana wakati Serena alipotwaa ubingwa wa Mashindano ya Wazi ya Marekani, licha ya kwamba jambo hilo lilifanywa siri kubwa na staa huyo.