Papa Francis aagiza kanisa liache mambo ya kidunia

Kiongozi mkuu wa Kanisa Katoliki Duniani, Papa Francis amelitaka kanisa lake na waamini kujihusisha moja kwamoja na kutafuta suluhu ya matatizo yanayoikabili dunia kwa sasa, kama alivyofanya Mtakatifu Francis wa Assisi.

Papa Francis ambaye alichukua jina hilo kutokana na kuvutiwa na maisha ya mtakatifu huyo, alitoa wito huo kwenye ibada maalumu ya hija ya watakatifu iliyofanyika kwenye Mji wa Assisi alikozaliwa mtakatifu Fransis.

Alisema umefika wakati kwa Kanisa kugeuka na kurejea misingi yake ya imani inayolenga kujali utu na kusaidia wanyonge na wenye shida, kurejea mahitaji muhimu ya kiimani kama alivyofanya mtakatifu huyo.

"Kanisa, sisi wote tunatakiwa kubadilika na kuacha kukumbatia mambo maovu ya kidunia. Mambo ya kidunia ni muuaji mkubwa kwa kuwa huua nafsi, yanaua watu na kuliua kanisa,” alisema alipokuwa akizungumza kwa hisia kali.

“Tusipokubali kubadilika sisi wenyewe kwa sasa, tutabaki kuwa waamini wakristo wa kibiashara, kama ilivyo keki dukani, ambayo huwa tamu iliwapo lakini hatutaweza kuwa na matunda halisi ya ukristo,” alisema.

Papa huyo kutoka Argentina pia alitoa salamu zake za rambirambi kutokana na ajali ya meli iliyowakumba wahamiaji kwenye Kisiwa cha Lampedusa huko Italia na kusababisha vifo vya zaidi ya watu 111 na wengine wengi wakiwa hawajulikani walipo.

Alisema anashangazwa na namna dunia isivyojali kuhusu mamilioni ya watu wanaokimbia utumwa, njaa na kukimbia maeneo yao kwa ajili ya kutafuta uhuru na namna wengi wanavyokufa kama ilivyotokea kwenye ajali hiyo ya juzi na kusababisha vilio kwa maelfu leo.

Tunahitaji kuthamini kilio cha wale wanaobubujikwa na machozi, wanaotaabika au kufa kwa sababu ya machafuko, ugaidi, uharamia au vita kwenye ardhi takatifu aliyoithamini Mtakatifu Francis, huko Syria, Mashariki ya Kati na maeneo yote duniani,” alisema Papa Francis.

Ziara hiyo ya Francis kwenye Mji wa Assisi inajenga dhana tofauti na waliomtangulia, John Paul II na Benedict XVI kwa kuwa amelenga kutoa ujumbe wa kitume kuhusu kuwajali masikini zaidi ya ujumbe wa kuhamasisha ushirikiano na mwingiliano wa kidini