SUMAYE 'AWALIPUA' UPINZANI

Waziri Mkuu mstaafu, Bw. Frederick Sumaye, amesema baadhi ya wabunge wa upinzani, wameugeuza ukumbi wa Bunge kama sehemu ya malumbano, matusi badala ya kujenga hoja ambazo zitachochea maendeleo kwa wananchi.

Bw. Sumaye aliyasema hayo Dar es Salaam juzi katika mahojiano maalumu na Majira juu ya maoni yake kuhusu madai ya upinzani wanaotaka Rais Jakaya Kikwete asisaini Muswada wa Sheria ya Marekebisho ya Sheria ya Mabadiliko ya Katiba mwaka 2013.

Alisema upo umuhimu wa wabunge hao kutii kanuni za Bunge ambalo ni chombo kinachoheshimika badala ya wabunge hao kupotosha maana nzima ya Bunge kwa ajili ya malumbano.

" Vyama vya upinzani vinashindwa kutumia fursa walizonazo ndani ya Bunge ili kujenga hoja ambazo zitachochea maendeleo ya wananchi badala yake ni watu wa kupinga na kukashifu hoja zenye tija kwa jamii," alisema Bw. Sumaye.

Akizungumzia suala zima la tozo ya laini kila mwezi, Bw. Sumaye aliitaka Serikali kuangalia uwezekano wa kutafuta vyanzo vingine vya mapato ili kupunguza makali ya maisha na kutekeleza miradi mbalimbali ya maendeleo.

Wakati huo huo, Bw. Sumaye amelaani vikali hatua ya baadhi ya viongozi wa vyama vya upinzani, kutaka Rais apunguziwe madaraka ya kuteua viongozi.

  "Rais anastahili kubaki na mamlaka hayo kwa kuteua baadhi ya viongozi kama Waziri Mkuu, Baraza la Mawaziri, Gavana wa Benki Kuu, Jaji Mkuu, Wakuu wa Vyombo vya Ulinzi na Usalama na wengineo," alisema Bw. Sumaye.